中央喺五月十九號，宣佈制止「動亂」；五月二十號宣佈戒嚴。有小道消息話，會特別針對果Ｄ著住睡衣周街行嘅人。
當呢個消息傳左出黎嘅時候，當時我地香港嘅反應係點呀？大家仲記唔仲得呀？一百萬人上街遊行呀，你有冇份呀？（好多人拍手）三十萬人參加「民主歌聲獻中華」，有邊位有去過呢？（好多人拍手）哦，開左燈就唔好拍囉，真係……我明白，一熄燈……
但係，大家知唔知道，當時我更加感興趣嘅，係另一樣野－－喺當時，每一日，都有Ｄ人真金白銀登報紙、登廣告，支持學運嘅，有好多係好得意嘅，我同大家分享一下。
嗱，呢一份，我拎返出黎嘅，係一九八九年五月廿四日，星期三晚，由中國神學研究院校友會，登左個嚴正聲明：「堅決支持北京學生民主愛國運動、反對武力鎮壓、轍消新聞封鎖」－－到第四點最有趣喇－－「深信上帝掌管歷史！」我終於都知道邊個係「幕後黑手」喇……
呢個又得意喇：「全力支持北京學生的民支愛國運動。」一群「義肢糾形師」……
嗱，呢個又得意喇：「呼籲：不要把錢移民，轉向支持學運；出錢支持北京學生運動，係全香港最佳投資保障。」呀，炒學運咁滯呀，真係。係兩間玩具廠商登嘅。聽講後黎出左個民主Barbie女神。
……
呢篇又正！「鳴謝李鵬」？呢篇真係抵死喇：「鳴謝李鵬，多謝你令十億中華兒女團結一致，推動愛國民主運動，喚醒沉睡的民眾，你已任務完成，敬請功成身退。」署名係：「極少數」、「極少數」人。喂，大佬，咁樣署名法，人地以為我呀，我覺得，咁鬼有幽默感嘅你，真係。
……
嗱，呢份犀厲喇呢份，最後一份喇：「港澳各界全體人士緊急呼籲……」而家大家睇到呢份野係咁細張嘅，其實係咁大張，成篇報紙都係架喇，成份都係，咁裏面都係果Ｄ「支持學運」嘅野黎，但問題係，果份名單就緊要囉，呢六、七百個名單裏面，我諗，如果你識嘅話，就拍一拍手：何鴻燊、李家誠、鄭裕彤、李兆基、羅德丞、羅康瑞、郭炳湘、郭炳江、梁振英、曾鈺成、林貝聿嘉……如果真係有秋後算賬嘅，我呢份野就值錢囉。我借俾你好唔好？各位，你知唔知道呀，我呢份野，我覺得唔係叫做「黑名單」呀，我呢份野係叫做「內部認購名單」呀。阿誠哥，你唔咁呀？我買樓都要排隊呀？阿誠哥……（黃子華將手上的「名單」不停地擺動著、指著）丫啊……真係……（黃子華仔細地讀著手上的「名單」）咁算啦，我去新華社排囉……個問題係，大家睇唔睇到呀？喺當時呢個咁嘅氣氛之下，大家相唔相信，共產黨真係用會武力鎮壓呀？我諗，Ｄ義肢糾形師會相信囉，因為有生意做啦嘛跟住落黎。咁但係喂，阿誠哥都支持學運喎！（以下的，要在以下的片段才能收看得到。）阿誠哥都公開支持買嘅股票，你驚佢會跌？呀唔係，唔係剩係阿誠哥呀，阿何生（何鴻燊）、阿李生（李兆基）、阿鄭生（鄭裕同）、阿郭生（郭炳商、郭炳江），大家都一齊買嘅股票，你驚佢會跌？唔會啩……係，而家個市係立亂Ｄ，但係，我地深信，到後尾一定會「向上調整」……學運一定會掂！
而家諗返轉頭，我地係幾咁幼稚……
沒有留言:
發佈留言