殖民漢奸是否有意妨礙香港在政治、文化、人權、法治、民主…方面的發展？

本人於「香港Yahoo知識+」為此文章作出首次的發表。
http://hk.knowledge.yahoo.com/my/profile?show=HA00536100


＊＊＊＊


發問者　：後現代膠神
發問時間：2007-12-04 12:38:47
http://hk.knowledge.yahoo.com/question/?qid=7007120400883
[政治]
回歸之前，中國快速香港化，香港則急速美國化，是否對香港有利？
殖民漢奸是否有意妨礙香港在政治、文化、人權、法治、民主…方面的發展？


＊＊＊＊


阿渣‧向陽回答：

你係咪香港人黎架？你對香港嘅歷史同時事點解一啲了解都冇架？

香港五十至七十年代，點解香港有咁鬼多人才、資金、廉價勞工走難黎香港呀？咪係因為中國唔好囉。

香港呢幾年，點解要「經濟轉型」呀？點解咁多「雙失」呀？點解咁多工廠執笠呀？點解咁多精英唔見左呀？點解咁多資金外流呀？咪係多得阿鄧仙人佢嘅改革開放路線囉。

如果你對香港嘅歷史有返些少嘅認識，加上你有啲啲咁多智慧嘅話，你就知道「中國好，香港更好。」呢句野係搵香港人笨七嘅大話黎個囉。雖然，前題「香港好，中國好。」係啱嘅……

「香港好，大陸好。大陸好，香港更屎。」呢個先至係真個囉。咁香港點先至會好呀？「大陸唔好，香港就好，因為港燦可以執大陸佬死雞。」

你都有睇電視嘅新聞架啦？「只要香港人發揮佢嘅優勢，就係對中國嘅貢獻。」香港到底有乜野優勢啫？咪係大陸冇嘅野香港有囉。咁香港有乜野大陸冇架？鄧仙人做國家主席果陣，咪就係「錢照賭、雞照叫」囉。而家都俾澳門過左我地呢班港燦嘅頭啦。咁而家香港仲有乜野優勢呀？人拳、文煮、髮字同鼓油呀？記唔記得臨立會第一次開會，就已經打敗左香港嘅《人拳法》架。而保障工人拳益嘅《雜睇啖判拳》，工聯會同埋民建聯都話，回龜前通過得太過草率，所以要推翻，遲啲再算，遲到而家大家都唔記左啦，咁咪唔使去算囉。

咁文煮呢？最快都要等到２０１７先有多小小機會煮到一半囉。而垃圾會呢半鑊文煮，仲唔知要等幾耐先煮得成添。無計啦，垃圾會呢鑊野，要煮嘅話，就要同果班攻人組別嘅太公囉豬肉丫嘛，俾你係太公，你肯唔肯俾先？梗係唔肯俾啦，係好似吳靄儀呀、張民光呀呢啲咁嘅矇到上心口嘅癲雞、傻佬，先咁肯戇居，分舊豬肉出黎嘅啫。而《鏗鏘集》都講，人地俾人屠殺左幾廿萬人嘅南京，都已經俾香港民主啦，南京人連局長都可以俾過佢地果啲市民去選。咁香港又唔可以同人地南京俾嘅，人地南京話晒都係四朝古都，而且仲係前朝中華民國嘅首都黎添，國父　孫中山先生都係喺果度做總統喎，南京人又幾經風雨，梗係民智高啲啦；香港人，不嬲都俾班死鬼佬管住，梗係冇人地啲南京人咁高民智啦。

而家香港咪剩返啲髮字同埋鼓油囉。不過，香港都有番咁上下年紀啦，你睇下胡仙單野，你睇下愛思鑊野，睇下鍾䄃淫大色髮件事，阿夏佳理生見到香港脫髮脫得咁犀利，都忍唔住咁講句：「The loser is Hong Kong.」唔再幫董伯伯同埋鼓油黨植髮，咸住口咁離開垃圾會同鼓油黨啦。仲有《基本法‧廿四條》呢？香港嘅髮治俾阿董伯伯抆走左幾多條呀？仲有《基本法‧附件一》同《附件二》呢？香港已經出現左地中海啦，仲有幾多髮可以俾香港人去醫治呢？鍾䄃淫大見到我地香港咁多五顏六色嘅頭髮，都要幫香港色下髮啦。

好彩，《基本法‧廿三條》呢條白頭髮，被香港嘅泛民以文煮嘅方法煲走左啫，如果唔係，香港仲有幾滴頭髮鼓油剩呀？

「香港人只要保住同發揮自己嘅優勢，就已經係為國家出左分力。」咁我地到底要唔要再食鼓油呀？鼓油係有味精架。你睇下阿劉嘉玲同埋阿嬌嘅故仔啦，食鼓油食咁多，因住食死你呀。哦，原來香港出品嘅鼓油，一定要有味先受歡迎嘅……有味嘅香港鼓油，咪就係香港嘅優勢囉。咁點解《中大學生報》會俾人周嘅？因為佢開盅明義講明自己係情色丫嘛。香港人不嬲都唔鍾意講情，只鍾意講錢架啦，佢地果啲情仲有色嘅添，你話死唔死？鼓油最梗要係有味同有錢，有味咪受大眾歡迎囉，有錢去俾安家費咪乜都得囉。

「要兄弟定要黃金？」香港人一定答你：「緊係要兄弟啦！」因為對於果啲幫唔到自己搵賺錢嘅，香港人都唔會當佢地係兄弟啦。

殖民漢奸？你指邊位呀？指幫過多位督爺入行政立法兩局做雙料議員，又俾港英政府委任做太平紳士，而又有過居英權同多重國籍嘅范太、譚小姐同李鵬飛呀？佢地而家都已經洗左底，做番個好人啦，你係咪要好似《無間道》裏面嘅陳永仁咁（陳永仁係由梁朝偉飾演嘅），連條生路都唔俾人地行下先？

定係，「殖民漢奸」，係指喺港英政府嘅「殖民」時期，做出賣中國人、香港人利益嘅「漢奸」呀？果啲喺香港放菠蘿嘅人，而家已經飛上枝頭，拎到「大屎經昏章」喇，而果啲喺文革時期積極參與動亂嘅學生領袖，聽阿季羨林生講，佢地而家好多都做梗達官貴人架喇，你講野真係要小心啲囉，如果唔係果啲「陽謀」家再黎一個「引蛇出洞」，或者，喺《基本法‧廿三條》真係俾「愛國」嘅「黑社會」通過左之後，你就真係會變成名正言順嘅「漢奸」架喇－－一係坐監，一係被放逐，冇第二條跟你揀。唔係，秋後算賑果陣，你仲可以揀「自絕於人民」一途。


＊＊＊＊


發問者評價：
我唔係香港人黎架？我係9龍出世!!我在9龍長大,讀小學時候只記得當時維他氣水賣2毛一支!!!

你都傻傻地!!咁你做咩返大陸搵些會對殖民放菠蘿嘅人種做老婆,不去殖民英國搵老婆!!!!