落莊感言（２００１年春）

不知怎的，近來總是愛回顧一下往事……或是，是因為到了「扶正除奸聯盟」當過一會兒的義工之故吧。以下是本人在大學當了一年學生會幹事後，所寫的「落莊[Leo Ja1] 感言」，本人當時的職位是「電腦排版」。此文刊登於科大學生會會刊《振翅‧第8.3期》之中：

＊＊＊＊

上莊[Leo Ja2] ，有人認為係浪費時間、勞心勞力。但係，上莊，對我黎講，真係令我見識到好多嘢，喺大學呢個社會嘅縮影裏面，見識到好多人同事。

上莊，令我學識到解決問題嘅重要性。有個莊Mate[Leo Ja3] ，佢有好強嘅分析能力。每每要解決問題嘅時候，佢都可以好有耐性咁樣，將每一個由其他莊Mates所提出的方案，抽絲剝繭，發掘一切可能會存在嘅弊病，佢亦會從唔同嘅角度，用唔同嘅觀點，花上很多時間，好細膩咁分析得清清楚楚、徹徹底底、明明白白。只可惜，到最後都係搵唔到解決問題嘅辦法……

而呢位莊Mate，又同時係一位富有正義感、好有責任感嘅土木工程系師兄。佢逢親開會做野呀，都有早冇遲，做事好有交帶添，而且佢嘅言論永遠都係企喺正義果邊。佢嘅鐵面無私，喺我心目中留下好深好深嘅印象。為左唔好俾非學生會會員，拎到用學生會會費黎印製嘅學生會法定刊物（即係呢本《振翅》呢），佢曾經動議過，要燒毀所有剩餘嘅刊物（唔好益人丫嘛，佢地雖然都係科大學生，但係冇交會費），仲話呢個係最節衷、最正當（唔會俾其他人非議就為之「正當」喇）嘅方法添。

呢個師兄，仲係一個好果斷勇敢嘅人黎添。記得，有一次我們開會果陣，有幾個莊員唔可以如期交稿，佢就立刻動議：「為免令到我地嘅出版時間一拖再拖，如果佢地唔可以如期交稿嘅話，就刪除佢地負責嘅文章。」每本《振翅》，平均一百到百二頁，分為六個主題，這個師兄所負責的主題，每期只得十數頁，而其他寫稿嘅莊Mates就要負責二十到四十頁文稿，實在是「眼高手低」、「不負責任」、令到出版期「一拖再拖」的麻煩人。而如我這些普通得低俗又愛諉過的閒人，心底面只會想著怎樣去包庇自己嘅朋友，又點忍心插自己嘅同僚呢？但係，佢就係一個無私得不平凡嘅人。身兼評議員同編委會委員兩個職位嘅佢，喺佢覺得我地嘅內部開會做錯決定嘅時候，佢會理直氣壯咁樣糾正我地：「我將會係第一個喺ＡＧＭ[Leo Ja4] 插你地嘅評議員！」可以結識到佢，我諗，係我人生嘅榮幸黎架。

上莊，我仲結識到一位專做大事嘅地鐵老闆[Leo Ja5] 。佢係一個乜野人呀？荀彧曾經咁樣評論過曹操：「大事精明，小事疏忽。」我覺得，呢句說話都幾適合去形容佢架。佢呀，有車牌又有車，得閒可以花幾千蚊去下旅行，買下Digital Camera[Leo Ja6] ，仲可以好豪氣咁用幾萬蚊黎買地鐵股票添，賺左好多錢架；之但係，當佢幫個莊印傳單嘅時候，竟然唔開單，令到個莊冇左五千蚊，史稱「五千元『奸商』事件」（「奸商」一詞，其實係由地鐵老闆自己Define[Leo Ja7] 嘅，雖然唔見錢嘅主因係佢冇開單，而唔係呢個「奸商」或印刷商奸）。畢竟，佢呢啲賺大錢嘅人，駒駒果五千蚊，佢又點會放喺心入面丫。其實，我真係非常之仰慕佢架，每次見到佢，我都會不自覺咁樣，諗起我地香港嘅特首董伯伯。董伯伯有「八萬五」事件，事後無聲消逝；佢亦都有一單「五千元『奸商』事件」，平時佢就提都唔提一下，當我地開會檢討呢件事果陣，佢就好巧妙咁認錯，之後立即講句：「好，到下一個議題。」（就算個會仲未搵到補救方法……）董伯伯好著重群策群力，成日話要團結；佢都好著重我地個莊嘅團隊合作精神架。好似「五千元『奸商』事件」之後，佢好強調：「我地呢個莊係集體負責制。」－－一人出錯，全莊背鑊。佢仲係一個好深不可測嘅人。在評議會裏面，每一個組織都有一致嘅口徑，但係地鐵老闆喺參與評議會會議果陣時，就有咁嘅口頭禪：「我覺得，我地個Ｐ[Leo Ja8] 唔係好啱囉。」

上莊，令我深深咁體會到「一樣米」真係可以養出「百樣人」架。

「吓？乜世上真係有啲咁樣嘅人個咩？你吹水咋嘩……」

大佬呀，我厄你做乜叉野先？呢啲係真人真事冇改編架。

「哦，你話梗我喇，我要寫大字報！我要澄清！」

你有番咁大個人喇，就唔好好似細路仔咁啦，你應該好好咁反省下，好好咁檢討下自己啦……

「唔得！你話梗我！我一定要寫大字報！我一定要澄清！」

哦，你想學我咁無聊同低能嘅話，就悉隨尊重啦下， 如果你唔怕越描越黑嘅話；如果你唔相信公道自在人心嘅話。畢竟，真相係越辯越明個囉。

註：刪去了數百字香港警方及法庭常用的「香港常用字[Leo Ja9] 」。

２００１年春
＜＜完＞＞

[Leo Ja1]「落莊」，即卸任學生會幹事工作的意思。

[Leo Ja2]「上莊」即是擔任學生會幹事的工作

[Leo Ja3]「莊Mate」即是一同組織學生會幹事會的同僚。

[Leo Ja4]ＡＧＭ，即Annual General Meeting，週年常務大會

[Leo Ja5]當時香港鐵路前身「地鐵公司」ＭＴＲ正在公開招股。這位莊Mate多次公開地表示自己已買入地鐵的股份，成為了「地鐵老闆」。

[Leo Ja6]數碼相機。當時一部數碼相機，動輒數千元。

[Leo Ja7]Define，即是定義的意思。

[Leo Ja8]Ｐ，即是President的簡稱，中文為「主席」。

[Leo Ja9]由香港政府所編註的「香港常用字」。聽說，當中警方及法庭最常用的，是廣州話的粗口字。